Gögnum er raðað í hillur eftir flokkunarkerfi og bókasafnskerfi er lykill að staðsetningu þeirra í hillu.

Gögn framhaldsskólasafna eru flokkuð og þeim raðað upp eftir flokkunarkerfi Deweys. Kerfið, sem er byggt á stigveldi, hefur tíu mismunandi aðalflokka eftir fræðigreinum sem síðan skiptast niður í nákvæmari undirflokka. Flokkunin segir til um efni og hvar bókin er staðsett í hillum safns.

Aðalflokkar Dewey-flokkunarkerfisins

000 Almennt efni, tölvufræði
100 Heimspeki, sálfræði
200 Trúarbrögð
300 Félagsvísindi
400 Tungumál
500 Raunvísindi
600 Tækni (hagnýt vísindi), iðnaður
700 Listir, skemmtanir, íþróttir
800 Bókmenntir og stílfræði
900 Landafræði, ævisögur og sagnfræði

Hver yfirflokkur skiptist niður í nákvæmari undirflokka. Dæmi:

800 Bókmenntir og stílfræði	300 Félagsvísindi
810 Íslenskar bókmenntir	305 Þjóðfélagshópar
811 Íslensk ljóð	305.4 Konur

Bókum safnsins er raðað í númeraröð eftir flokkstölu. Í bókasafnskerfi er hægt að leita að bók og sjá hvar hún er staðsett í hillu. Flokkstalan (númerið) vísar á hilluna og raðorð (oftast þrír fyrstu stafirnir í nafni höfundar) segir til um hvar bókin er í stafrófsröð innan flokksins, t.d. væri ljóðabók eftir Þórarinn Eldjárn í 811 Þór. Kjölur bókar er merktur með þessari staðsetningu og hillur bókasafns eru merktar með flokkstölu. Athugið að íslenskum höfundum er raðað eftir skírnarnafni en erlendum höfundum eftir ættarnafni.

Oft er gögnum raðað á mismunandi staði eftir formi. Bækur, tímarit, hljóðrit (tónlist/hljóðbækur) og myndefni (kvikmyndir/fræðslumyndir) geta verið í mismunandi hillum og nýju efni stillt upp sérstaklega.